ОШ, 18-авг. – Sputnik. Ош — Эркеч-Там жолунун 37-чакырымында Daewoo Lanos жана Honda Torneo унаалары кагышып, эки адам окуя болгон жерде каза болду. Бул тууралуу облустук милициянын маалымат катчысы Жеңиш Аширбаев билдирди.
Анын айтымында, окуя 17-август күнү болжол менен саат 02:00 чамасында Кара-Суу районунун Бекжар айылынын аймагында болгон. Алай районунун Коңур-Дөбө айыл амагынын Боз-Караган айылынын 26 жаштагы жашоочусу Daewoo Lanos унаасы менен Ош шаарынан Алайды көздөй бара жатып каршы тилкеге чыгып кеткен.
"Натыйжада Алайдан Ошту көздөй келе жаткан Кара-Суу районунун Мады айыл аймагынын Кыргыз-Чек айылынын 29 жаштагы тургунунун башкаруусундагы Honda Torneo унаасы менен кагышып кеткен. Кырсыктын кесепетинен Daewoo Lanos унаасынын айдоочусу менен 24 жаштагы жүргүнчүсү окуя болгон жерде көз жумган. Ал эми экинчи машинанын айдоочусу менен биринчи унаадагы үч жүргүнчү Ош облустук ооруканасына жеткирилип, жандандыруу бөлүмүнө жаткырылган. Ооруканага түшкөн айдоочу Чоң-Алай райондук ички иштер бөлүмүнүн кызматкери, милициянын кенже лейтенанты", — деди Аширбаев.
Ал эми авто унаалардын карама–каршы келе жаткан багытка чыгып кагылышуунун себебин аныктоо максатында автотехникалык экспертиза дайындалды.
Учурда текшерүү иштери улантылууда.
