БИШКЕК, 16-авг. — Sputnik. Жалал-Абад облусунда аскер кызматын өтөп жүргөн жоокер сууга чөгүп каза болду. Бул тууралуу Sputnik Кыргызстан агенттигине ӨКМ билдирди.
Маалыматка ылайык, 13-август күнү Таш-Көмүр шаарында жайгашкан №2 издөө-куткаруу отрядынын куткаруучулары Нарын дарыясынын жээгиндеги эс алуу жайында сууга чөгүп кеткен жаранды издөөгө барышкан.
"Кырсык болгон күнү издөө иштери саат 19:00гө чейин болуп, андан соң аскердик кызматын өтөп жаткан төрт жоокер жуунуп алуу үчүн майордон уруксат алып сууга түшкөн. Бир аз убакыттан кийин куткаруучулар жээкке сүзүп чыгып катардагы жоокер Д.у.Мди таппай калган. Ал куткаруу иштерине катышкан эмес, ошол жердеги куткаруучуларга тамак-аш даярдап берип турган", — деп жазылат билдирүүдө.
Аскер кызматын өтөгөн 21 жаштагы жигиттин сөөгү кийинки күнү гана саат 14:22де табылган. Учурда Өзгөчө кырдаалдар министрлиги тарабынан комиссия түзүлүп, тийиштүү органдар кызматтык иликтөө жүргүзүүдө.
