Алтай конференциясы кыргыз тилинин өнүгүүсүнө салым кошот. Анткени конференциянын жүрүшүндө алтай, түрк, монгол элдеринин тил маселелери талкууланат. Бул тууралуу Гүлзада Билбаева Sputnik Кыргызстан радиосунун таңкы эфиринде маек куруп жатып билдирди.
Анын айтымында, аталган иш-чара Ккөчмөндөр оюндарынын алкагында өткөрүлөт.
"Бул конференциянын тарыхы 1957-жылга такалат. Ошол жылдын 4-сентябрында Мюнхен шаарында чыгыштаануучулардын конгрессинде "Алтай конференциясы" түзүлгөн. Былтыр Венгрияда өткөн 60-конференциянын алкагында илимпоздордун кийинки жыйынын Кыргызстанда өткөрүү чечими кабыл алынган. Буюрса учурда 22 мамлекеттен келчү окумуштууларды күтүп жатабыз. Даярдык иштери пландык негизде жүрүүдө. Аталган иш-чара өлкөбүздүн илим тармагына чоң салымын кошот. Анткени мындай абройлуу конференциянын алкагында алтай элдеринин, түрк, монгол тилдүү калктын, анын ичинде кыргыз тилинин каралышы сөзсүз түрдө эне тилибиздин өнүгүүсүнө көмөк болот", — деди Билбаева.
Ал эл аралык Алтай илимий конференциясы 26-31-август күндөрү Бишкек шаарында өткөрүлүп, 2-сентябрга дейре Ысык-Көлдө уланарын кошумчалады.
