БИШКЕК, 25-июл. — Sputnik. Чүй облустук ооруканасына автобус менен жеңил автоунаанын кагышуусунан жабыркаган көптөгөн жарандар кайрылып жатат. Бул тууралуу ооруканадан билдиришти.
Жол кырсыгы бүгүн, 25-июлда, эртең менен саат 8:00дөр чамасында Фрунзе менен Курманалиев көчөсүнүн кесилишинде болуп, Toyota Aristo жеңил автоунаасы менен №38 каттамдагы автобус кагышкан.
"Көп кишини алып келишти, жабыркагандар дагы деле түшүүдө. Оор абалда болгондору да бар. Бардыгын медициналык кароодон өткөрөбүз, канча киши келгенин санаган жокпуз. Жетишпей жатабыз", — деп ооруканадан билдиришти.
Toyota Aristo үлгүсүндөгү автоунаанын айдоочусу саатына 80 чакырым менен бараткам деп ишендирип, алдындагы автобус капысынан бурулганын айтты. Анын жүргүнчүсү автобус бурулуп жатканда жеңил автоунаа келип сүзгөнүн билдирди.
Күбөлөрдүн айтымында, автоунаалар кагышкан учурда айдоочу маңдайкы терезеден ыргып кеткен. Ал эми автобус таштанды контейнерлери турган жерди барып сүзүп токтогон.
