БИШКЕК, 3-июл. — Sputnik. Медреседе окуган жаштарга кесиптик билим берүү долбоордун алкагында жети облустан тандап алынган медреселерге атайын жабдуулар таркатылды. Бул тууралуу муфтияттын маалымат кызматы билдирди.
Долбоордун алкагында азыр "ашпозчу-кондитер", "компьютер колдонуучу", "бал челекчи", "ширетүүчү", "электрик" жана "тигүүчү" сыяктуу кесиптер республика боюнча жалпы 17 медреседе кесип катары окутулуп, үйрөтүлүүдө.
Медреселер Дин иштери боюнча мамлекеттик комиссиясы жана муфтияттын дин башкармалыгы аркылуу тандалган.
"Бул жылы жалпысынан 10 медресеге 3 миллион 347 миң 760 сомго жабдуулар сатып берилди. Буюрса алар 1,5-2 айдын аралыгында мыкты кесип үйрөнүп чыгышат. Кесипке үйрөтө турган атайын окуу китептерин биздин эксперттер кылдат иликтеп, даяр окуу куралы катары иштеп чыгышкан", — деп айтылат маалыматта.
Кесиптик билимге ээ болгон медресе бүтүрүүчүлөрүнүн 70 пайызы жумуш таап кеткени айтылат.
