БИШКЕК, 27-июн. — Sputnik. Өлкө башчысы Сооронбай Жээнбеков Кыргызстанда парламенттик демократия орношун көздөй турганын өз сөзүндө баса белгилеп, авторитаризмди орнотуунун потенциалдык мүмкүнчүлүгүн жоюу керектигин кошумчалады.
"Менин терең ишенимимде кыргыз коомунун кыртышына жана табиятына парламенттик демократия туура келет. Бул мамлекеттин туруктуу өнүгүп, коомдо стабилдүүлүктүн бекем орношуна негиз болот. Акырындап ушул чоң саясий реформаны ишке ашыруу — келечектеги максатыбыз. Ага жетүү үчүн биринчи кезекте Жогорку Кеңеш өзү даяр болушу керек. Өлкөнүн келечегине, өсүп-өнүгүүсүнө, жарандарыбыздын жакшы жашоосуна жеткирчү багыттарды аныктап, өкмөт менен чогуу жоопкерчиликти моюнга алып, иштөөсү зарыл. Келерки шайлоонун бардык этабын ачык, таза, адилеттүү өткөрүү керек", — деди ал.
Преиздент, андан тышкары, шайлоого катыша турган бардык партияларга бирдей шарт түзүлүп, анык саясий атаандаштыкты камсыздоого жетишүү керектигин айтты.
Президент өз кайрылуусунда депутаттык мандатты алуу кезегин партиянын лидери эмес, шайлоочулар аныктоочу деңгээлге жетүү зарылдыгын билдирди.
