БИШКЕК, 23-июн. — Sputnik. Түркиянын президенти Режеп Тайип Эрдоган өзүн жана Россия лидери Владимир Путинди Бириккен улуттар уюмунун Башкы ассамблеясынын тажрыйбалуу саясатчысы катары бааларын айтты. Бул тууралуу РИА Новости жазып чыкты.
Түркия жетекчиси Путин менен көп окшоштуктары бар деген пикирин да билдирген.
"Бириккен улуттар уюмунун Башкы ассамблеясы боюнча тажрыйба туурасында айтсам, көбүрөөк тажрыйбага ээ болгон эки саясатчы бар. Алардын бири — мен, экинчиси — Путин. Себеби президенттик мөөнөттөрдү жана премьер-министрлик кызматтарды катар койсок, жалпы процесс бизде 15-16 жыл болуптур. Мунун жыйынтыгын карап туруп, ошол нерселердин майнабы менен алдыда жасай турган иштер бар экенин көрүүгө болот", — деди Эрдоган.
Бул сөздөрүн өлкө башчы Түркияда жекшембиде боло турган президенттик жана парламенттик шайлоолордун алдында TRT телеканалына маек берип жатып айткан.
Жекшембиде, 24-июнда, Түркияда мөөнөтүнөн мурда президенттик шайлоо болот. Ага учурдагы башкаруучу Адилет жана өнүгүү партиясынан Түркиянын учурдагы президенти Тайип Эрдоган, оппозициялык маанайдагы Элдик республикалык партиясынан Мухаррем Инжи, Элдик демократия партиясынан Селахаттин Демирташ, Жакшы партиядан Мерал Акшенер, Бакыт партиясынан Темел Карамоллаоглу жана Мекен партиясынан Догу Перинчек катышууда.
Президенттик шайлоо менен парламенттик шайлоо да болот.
