Таласта 11 жаштагы бала досун мылтык менен атып алды

БИШКЕК, 4-июн. — Sputnik. Таластагы Кара-Буура районунун Аманбаев айылында 11 жаштагы бала досун мылтык менен атып алганын облустук милиция билдирди.

Маалыматка ылайык, окуя 27-май күнү болгон.

"Кара-Буура РИИБине 27-майда жергиликтүү ооруканага октон жаракат алган баланын түшкөнү тууралуу кабар түшкөн. Милиция кызматкерлери Аманбаев айылында 11 жаштагы балдар ойноп жатып, бир үйдүн сарайынан эски мылтык таап алышканын такташты. Балдардын бири мылтыкты экинчисинин колуна такап туруп атып жиберген. Натыйжада жаракат алган бала Кара-Буура аймактык ооруканага жаткырылган", — дешти милициядан.

Тергөөнүн жүрүшүндө үйдүн ээси кырсыктан бир нече күн мурун дат баскан мылтык таап алып, ок салган жерин ача албай сарайына коюп койгону аныкталды.

Милициядан жабырлануучунун ата-энеси арыз жазуудан баш тартканын айтышты.

Бала ушу тапта Бишкектеги Травматология жана ортопедия илим изилдөө борборунда дарыланып жатат. Ооруканадан баланын колуна операция жасалып, учурда абалы канааттандырарлык экени белгилүү болду.