Ошол жылы болочоктогу белгилүү режиссер Аман Камчыбеков "Лифти бар үйдөгү тепкичтер" фильмин жараткан. Анда Сабира Күмүшалиева менен Жумаш Сыдыкбекова башкы ролду аткарып, байбичелердин образын жараткан.
Фильмдин эпизодуна катышып калган Кыргыз Республикасынын эл артисти Чоро Думанаев ал кезеңди мындайча эскерет.
"Тасма Аман Камчыбековдун дипломдук иши болгон. Негизи дипломдук иштер чаң басып эле калат го, бирок анын эмгегин телевидение сатып алып элге сунуштаган. Кыска метраждуу фильм көрүүчүлөр тарабынан жылуу кабыл алынып бат эле элдин сүймөнчүлүгүнө айланган. Башкы ролду ойногон Күмүшалиева менен Сыдыкбекова биздин энелерибиздей эле болчу. Биз жашпыз да тентек кылсак, акыл-насаатын айтып өз балдарындай көрчү. Ал эми режиссеру Аман аябай таланттуу инсан эле. Жол кырсыгына кабылып бул дүйнөдөн эрте кетти", — деди Думанаев.
"Лифти бар үйдөгү тепкичтер" фильми кийин эл аралык фестивалдарда бир катар сыйлыктарды багындырган.
