БИШКЕК, 24-май — Sputnik. Талас шаарында теректерди мыйзамсыз кыйган жаран кармалды. Бул туурасында Экотехинспекциянын маалымат кызматынан кабарлашты.
Билдирмеге караганда, М.Р. аттуу шаар тургунун 224 даана мырза теректи уруксат кагазы жок, өзүм билемдик менен кыйдырып, оор жүк ташуучу унаага жүктөп жаткан жеринен инспекторлор колго түшүргөн.
"Териштирүүнүн жүрүшүндө теректер кыйылган 38,803 чарчы метр жер тилкеси Талас шаардык муниципалдык менчик башкармалыгы тарабынан жергиликтүү тургун Бөлөкбаевге 2029-жылга чейин жашылдандыруу багытында ижарага берилген. Теректер муниципалдык менчиктин карамагында болгондуктан уруксатсыз кыюуга тыюу салынган. Ага жеринде тийиштүү акт, протоколдор толтурулуп жаратылышка келтирилген зыяны үчүн 210 057 сом доо коюлду", — деп айтылат маалыматта.
Кармалган жаранга карата чара көрүү үчүн тийиштүү материалдар Талас облустук Ички иштер башкармалыгына өткөрүп берилди.
