Сабаттуу мугалим ишсиз калбайт. Азыр көптөгөн жеке менчик мектептер ачылууда. Мындай пикирин Абдывахаб Нурбаев Sputnik Кыргызстан радиосунда министрдин мугалимдерге саат бөлүштүрүүдөгү босого жүктөмү боюнча буйругун талкуулап жатып билдирди.
Анын айтымында, азыр мугалимдерде репетиторлук менен алектенүү мүмкүнчүлүгү да жогору. Анткени канчалаган ата-эне балдарына кошумча окутуучу издеп жүрүшөт.
"Министрдин жаңы буйругу мугалимдер арасында көп деле көйгөй жаратпайт деп ойлойм. Анткени бизде, тескерисинче, мугалимдер жетишсиз. Ошол эле учурда соңку жылдары бала бакчаларды көбөйтүүгө басым жасалууда. Ал жакка барып иштесе да болот же балдарга кошумча сабак берүүчү курстарды ачып алышсын", — деди Нурбаев.
Ал мындай кадамдар билим берүүнүн сапатын жогорулатарын кошумчалады.
