БИШКЕК, 24-май — Sputnik. Футбол федерациясынын дисциплинардык комитети Бишкектин "Алга" клубу менен Оштун "Алай" командасынын ортосундагы окуя боюнча чечим чыгарды. Бул тууралуу аталган федерациядан кабарлашты.
Буга чейин Чүй облустук милициясы 20-май күнү болгон оюндан кийин эки команданын оюнчулары ортосунда чыр чыкканын билдирген.
"Алганын" маалымат кызматы мушташ "Алай" клубунун гвинеялык чабуулчусу Алиа Силланын айынан чыкканын билдирип, чырга "Алганын" оюнчуларынын тиешеси жоктугун маалымдаган.
Окуянын видеосу Facebook социалдык тармагына тараган болчу.
Бул маселе боюнча 23-май күнү дисциплинардык комитеттин жыйыны болуп өттү. Алар "Алай" клубунун машыктыруучусунун нааразычылыгын жана оюндун судьялары Тимур Файзуллин менен Артем Скопинцевдин рапортун карап чыгышты.
Ошондой эле эки клубдун өкүлдөрүнүн аргументтерин угушту.
Натыйжада дисциплинардык комитет төмөнкү чечимге келди:
— "Алга" футбол клубу стадиондогу коомдук тартип менен коопсуздукту сакташ үчүн тийиштүү чара көрбөгөнү үчүн 50 миң сом айып салынсын;
— "Алга" клубу оюндун жүрүшүнө жооп берген кызматкерин жазалоо маселесин карап чыгышы керек;
— Оюндун комиссары Андрей Ситоленко үч расмий беттештен четтетилсин;
— "Алай" клубунун чабуулчусу Алиа Силла 10 оюндан четтетилсин;
— Оюндун арбитри Тимур Файзуллин Алия Силланын айынан чоң жаңжал чыгып кеткени үчүн 2018-жылдын аягына чейин Топ лиганын оюндарын тейлөөдөн четтетилсин.
