БИШКЕК, 16-май — Sputnik. Жогорку Кеңештин бүгүнкү жыйынында депутаттар мурдагы премьер-министрдин эл өкүлдөрүн "саясий өлүк" деп атаганын эске салды. Бул боюнча Сапар Исаков өз оюн билдирип өттү.
"Биз парламентке отчетту тапшырып жатканда сегиз комитет колдогон. Башкаруучу коалициянын курамына кирген эки партия дагы колдоп, бир күндөн кийин эле позициясы өзгөрүп кеткенине өзүмдүн баамды бердим. Менин жообум ушундай", — деди ал.
Исаков ошондой эле анын өкмөтү ТЭЦтин айынан кетти деген пикирлерге кошулбай турганын белгиледи.
Ал эми депутат Искендер Матраимов Исаковдун өкмөтүнүн кетишине ТЭЦтеги авария шыкакчы болуп, Liglass, Huawei компаниялары менен түзүлгөн келишимдин аягына чыкпай, ара жолдо калганы өкмөттүн кетишине башкы себептердин бири болгонун белгиледи.
Эске салсак, Сапар Исаков кызматтан кеткенден кийин "Апрель" телеканалына маек берип жатып парламент "саясий өлүккө" айланганын айткан болчу.
