БИШКЕК, 16-май — Sputnik. Жогорку Кеңештин бүгүнкү жыйынында "Республика — Ата-Журт" фракциясынан депутат Талант Мамытов ТЭЦтеги авария боюнча бардык жоопкерчиликти мурдагы премьер Сапар Исаков өз мойнуна алышы керектигин айтты.
Депутат өз сөзүндө 2017-жылы 10-майда ошол учурдагы премьер-министр күз-кыш мезгилине даярдык көрүү боюнча токтом чыгарганын айтып, Сапар Исаков өкмөткө күзүндө келип, 2-ноябрда парламентке келип кышка даярбыз деп маалымат бергенин кошумчалады.
"Сапар Исаков кышка даярбыз деп маалымат берип, катылып жаткан кемчиликтерди жашырганы үчүн ТЭЦтеги авариянын жоопкерчилигин алышы керек", — деди ал.
Мамытов ошондой эле эгер президенттин жетекчилиги менен өткөн коопсуздук кеңешинин жыйынында коррупцияга каршы күрөшүү маселеси көтөрүлбөсө бул иштер "бармак басты көз кысты" болуп фактылар айтылбай калмак деген пикирин айтты.
Белгилей кетсек, бүгүн, 16-майда, Бишкек ТЭЦтиндеги аварияны жана модернизациялоого кеткен каражаттын сарпталышы боюнча депутаттык комиссиянын корутундусу кароо уланып жатат.
