БИШКЕК, 14-май — Sputnik. Мурдагы премьер Сапар Исаков экс-президент Алмазбек Атамбаев түз жүргөнүн, коррупцияга малынбаганын УКМКнын сурагына кирип бара жатып журналисттерге билдирди.
Белгилей кетсек, Улуттук коопсуздук мамлекеттик комитети Исаковду экинчи жолу суракка чакырды.
Мурунку премьер-министр ошондой эле Атамбаев менен чогуу иштеген команда абдан таза болгонун, ал мезгилде коррупция жок болгонун айтты.
"Ал команданын ичинде азыркы президент Сооронбай Жээнбеков дагы болгон. Ошондуктан ал киши деле өзү жакшы билет, Алмазбек Шаршенович абдан түз жүргөн, коррупцияга малынбаган, коррупция менен биринчи күрөштү баштаган болчу", — деди ал.
Мурдагы премьер тергөө иштери саясаты жок жүрүшү керектигин айтып, парламентте депутаттар өз иши менен алектенип, тергөөчүлөр тергөө менен гана алек болушу керектигин белгиледи.
Исаков депутаттык комиссиянын корутундусу боюнча да пикирин билдирип, анда кээ бир фамилиялар айтылып, айрымдары айтылбай жатканын, мындай мамиле туура эместигин, айтылса бардык фамилия айтылышы керектигин кошумчалады. Ал буга чейинки суракта ТЭЦти модернизациялоого тийиштиги бар бардык фамилияларды айтканын баса белгиледи.
Исаков 26-апрелде дагы УКМКга "Бишкек ТЭЦин модернизациялоо" долбоорунун алкагында козголгон кылмыш иши боюнча күбө катары чакырылган.
