Ош ОИИБ: Өзгөндө кырсыкка кабылган унаа Абылгазиевдин кортежине таандык эмес

БИШКЕК, 9-май — Sputnik. Өзгөн районунда жол кырсыгына кабылган эки жолтандабас премьер-министр Мухаммедкалый Абылгазиевдин кортежине таандык эмес. Бул туурасында Ош ОИИБдин маалымат кызматы билдирди.

Буга чейин Жол кыймылы коопсуздугун камсыздоо башкы башкармалыгы буга карама-каршы маалымат берген болчу. 

Маалыматка караганда, окуя 7-май күнү Ош облусуна караштуу Өзгөн районунда болгон. Кырсыктан эч ким жабыркаган эмес. Майышып калган Lexus үлгүсүндөгү унаалардын сүрөтүн адвокат Улан Жумаков Twitter баракчасына жүктөгөн. 

"7-майда саат 12.00дөр чамасында Ош — Бишкек жолунун 605-чакырымында Lexus LX 570 жана ВАЗ 2106 унаалары кагышкан. Алдын ала маалыматар боюнча жол кырсыгына ВАЗдын айдоочу күнөөлү болууда”, — деп билдиришти милициядан. 

Жеңил унаанын айдоочусунун айтымында, ал кортежди көрүп өткөрүп ийген. Бирок техникалык себептерден улам дөңгөлөгү ыргып кетип, жолду тосуп токтоп калган. Ошол убакта аны артынан келе жаткан Lexus LX 570 келип сүзгөн. Кырсыктын кесепетинен жабыркагандар жок. Эки тарап тең бири-бирине доо коюудан баш тартып, арыз жазышкан эмес.

Бул факты боюнча автотехниалык экспертиза дайындалып, териштирүү жүрүп жатат. Жол кырсыгына кабылган унаа өкмөт башчынын кортежине тиешелүү эмес деп айтылат маалыматта. 

Белгилей кетсек, премьер-министр Ош менен Жалал-Абад облустарына иш сапар менен кеткен.