Надырбеков: Көчмөндөр оюнуна келген ыктыярчылар дыкат көзөмөлгө алынат
Көчмөндөр оюнуна келген чет элдик ыктыярчылар дыкат көзөмөлгө алынат. Кооптонууга эч негиз жок. Бул тууралуу Союзбек Надырбеков Sputnik Кыргызстан радиосуна маек куруп жатып айтты.
Анын айтымында, быйылкы оюндарга 15 мамлекеттен 40 чет элдик ыктыярчы тартылган.
"Жалпысынан бизге 3000ден ашуун кат келди. Эки турдан турган тандоонун жыйынтыгында 550 адамды ыктыярчылыкка тандап алдык. Алардын 40ы чет элдик. Биз эл аралык тажрыйбаны колдонуп, ыктыярчылардын психологиялык абалына, билимине, канча тил билерине көңүл бөлдүк", — деди Надырбеков.
Ал иш-чара учурунда ар бир ыктыярчы дыкат текшерүүдөн өтөрүн кошумчалады.
Эскерте кетсек, эл аралык оюндар үстүбүздөгү жылдын 2-8-сентябрь күндөрү Ысык-Көлдө өткөрүлөт.
