БИШКЕК, 6-апр. — Sputnik. Балыкчы шаарынын тургуну милициянын этикадан тышкары жүрүм-турумуна даттанып, ИИМдин Ысык-Көл облусу боюнча ички иликтөө кызматына кайрылган. Бул тууралуу Ысык-Көл облустук ички иштер башкармалыгынын маалымат кызматынын өкүлү Сталбек Усубакунов кабарлады.
Маалыматка караганда, 4-апрель күнү Балыкчы шаарындагы кафелердин бирине кечки саат 18.30дарда төрт жигит кирген. Алар тамактанып отурганда бирөө сөгүнө баштаган. Ошол маалда жубайы жана кичине балдары менен отурган кафенин кожоюну ага жаш балдар отурганын айтып эскертүү берген.
"Ал жерден эки тарап уруша кеткен. Кафе кожоюнунун айтымында, төрт кишинин бирөө мас экен. Кафенин ээси окуя болгон жердеги видео көзөмөлдөгү материалды милицияга берди", — деп айтылат билдирүүдө.
Аталган фактынын негизинде ИИМдин Ысык-Көл облусу боюнча ички иликтөө кызматы териштирип, чатак чыгаргандар Ысык-Көл облусунун жол кыймылын көзөмөлдөө башкармалыгынын кызматкерлери экени белгилүү болду. Милициядан алардын аракеттерине принципиалдуу, зарыл болсо юридикалык баа берилерин айтышты.
