БИШКЕК, 5-апр. — Sputnik. Trustlook Lab корпорациясынын эксперттери эл көп колдонгон мессенджерлердеги маалыматтарды уурдап ала турган телефон вирусун аныктаганын "Известия" басылмасы билдирди.
Жаңы вирус телефондогу Telegram, Viber, Skype, Facebook Messenger мессенджерлериндеги маалыматтарды уурдап, башка серверге жибергенге жөндөмдүү. Андыктан эксперттер уурдалган маалыматты үчүнчү тарап кишини опузалоо үчүн колдонушу мүмкүн экенин белгилешти.
Киберкоопсуздук боюнча адистер вирусту Кытайдын Cloud Module тиркемесинен табышкан. Вирус катылган программа com.android.boxa деп аталат. Бул вирус шилтеме аркылуу жана Android дүкөнүндөгү шектүү тиркемелер аркылуу жугушу ыктымал.
