БИШКЕК, 3-апр. — Sputnik. Жалал-Абад облусунун Базар-Коргон айылында курулуп жаткан жаңы көпүрө жергиликтүү тургундардын өмүрүнө коркунуч жаратып жатканын Мамэкотехинспекциянын маалымат кызматы кабарлады.
Билдирүүгө ылайык, Кара-Үңкүр дарыясынын үстүнө салынып жаткан көпүрөнү курууда коопсуздук чаралары сакталбай жатат.
"Автокран менен курулуш материалдары иретсиз ташталууда. Андан сырткары, куруучулардын атайын күбөлүктөрүнун жоктугу, коопсуздук кийимдерин кийбегени аныкталды", — деп айтылат маалыматта.
"Инспекторлордун айтымында, аталган көпүрөнүн курулушу толук бүтө элек, бирок ага карабай жарандардын өмүрүнө коркунуч жаратуу менен пайдубалы кургай элек бетондордон кишилер өтүүдө. Натыйжада куруучулардын гана эмес, жеке жарандардын өмүрүнө чоң коркунуч пайда болууда", — деп таратылган билдирүүдө.
Жеринде Мамэкотехинспекциянын Майлуу-Суу шаары, Ноокен жана Базар-Коргон райондорунун инспекторлору кемчиликтерди четтетүү максатында Жалал-Абад курулуш башкармалыгынын участка башчысына айып пул салды. Ошондой эле техникалык коопсуздук талаптарын сактап иш жүргүзүү туурасында эскертүү жана түшүндүрүү иштери жүргүзүлдү.
