БИШКЕК, 26-фев. — Sputnik. Күрөш Кыргызстанда спорттун алдыңкы түрлөрүнүн бири, мамлекет тарабынан да жакшы каражат бөлүнөт. Бул тууралуу Жаштар иши, дене тарбия жана спорт боюнча мамлекеттик агенттиктин жетекчиси Канат Аманкулов Бириккен күрөш дүйнөсүнүн Азия кеңешинин (UWW Asia) жыл сайын өтө турчу жыйынында айтты
Эскерте кетсек, күрөштүн түрлөрү боюнча Азия чемпионаты эртең, 27-февралда, башталып 4-мартта жыйынтыкталат. Мелдеште медалдын 30 комплектиси ойнотулат.
Жыйын бүгүн борбордогу отелдердин биринде өтүп, иш-чарага Аманкуловдон тышкары Күрөш федерациясынын вице-президенти Мелис Турганбаев, Азия кеңешинин президенти Даулет Турлыханов жана 20 мамлекеттин өкүлдөрү катышты.
Мамагенттиктин жетекчиси Аманкуловдун айтымында, өлкөдө күрөш спорттун алдыңкы түрлөрүнүн бири.
"Эртең баштала турган Азия чемпионаты ийгиликтүү өтөт деп ишенем. Буга чейин 2007-жылы чоңдор арасында, 2012-жылы кадеттер арасында өткөргөнбүз. Күрөш Кыргызстанда спорттун алдыңкы түрлөрүнүн бири. Мамлекет тарабынан да жакшы каражат бөлүнөт. Балбандар мелдештерден куру кол кайтпайт," — деди Аманкулов.
Ал ошондой эле Азия чемпионатын Бишкекте өткөрүүнү колдогон Бириккен күрөш дүйнөсүнө ыраазычылык билдирди.
"Кыргызстан күрөш боюнча эл аралык мелдеш өткөрүүдө ири тажрыйбасы бар. Бул тууралуу мага техникалык делегаттар тастыктады. Биз дагы тиешелүү шарттарды түзүп бергенге аракет кылдык. Турнир жогорку деңгээлде өтөрүнө ишенем", — деди Турлыханов.
Жыйындын жүрүшүндө катышуучулар былтыр өткөн жана быйыл боло турчу ири мелдештер тууралуу сүйлөшүүлөрдү жүргүзүштү.
Күрөш түрлөрү боюнча Азия чемпионаты эртең, 27-февралда, башталып 4-мартта жыйынтыкталат. Мелдеште медалдын 30 комплектиси ойнотулат.
Марттын башы менен алыш күрөшү боюнча да КРдин биринчилиги өтмөкчү.
