БИШКЕК, 16-фев. — Sputnik. Ишемби жана жекшемби күнү Кыргызстандын бир катар аймактарында кар жаайт. Бул тууралуу Кыргызгидрометтен билдиришти.
Ага ылайык, Чүй, Талас, Ош, Жалал-Абад, Баткен облустарынын кээ бир райондорунда туман түшөт. Жолдор тоңуп, тайгак болот. Батыштан соккон шамалдын ылдамдыгы секундасына 2-7 метрге чейин жетет.
17-февраль, ишемби күнү Бишкек шаарында түнкүсүн —8…-10 градус суук болсо, күндүз —4 градуска чейин муздайт. Ош шаарында түндө —3…-5 градус суук болсо, күндүз күндүн табы 1 градуска чейин жылыйт.
Чүй менен Таласта дем алыш күндөрү түндө —12 градуска чейин суук болуп, күндүз —7 градуска чейин төмөндөйт.
Ош, Жалал-Абад жана Баткен облустарынын дыйканчылык аймактарында түндө —9 градуска чейин суук болуп, күндүз күндүн табы 3 градуска чейин жылыйт.
Ысык-Көлдө түнкүсүн —11…-12 градус суук болсо, күндүз абанын температурасы 0…-5 градуска чейин төмөн болот.
Нарында дем алыш күндөрү түндө —20…-22 градус суук болсо, күндүз —10 градуска чейин суук болот.
