Үстүбүздөгү жылдын 8-февралында борбор калаадагы Чүй менен Манас проспектилеринин кесилишиндеги жер алдындагы өтмөктө саат 18:06да тайгаланып жыгылган кош кабат келин жерге башы менен тийген. Бул учур видеого тартылып калган. Жанынан өтүп бара жаткандар жерде жаткан келинге чуркап келип, жардам көрсөткөн.
Беш айлык боюнда бар келин катуу жыгылгандыктан, саамга эс-учун жоготуп койгон.
"Жыгылган келинге жардам бергендердин бири Тез жардам чакырганы менен келген эмес. Бир нече убакыттан кийин күйөөсү келип, ооруканага алып кетти", — деген окуянын күбөсү.
Медиктер жабырлануучунун Улуттук госпиталга кайрылгандыгын, бирок ал ооруканага жатуудан баш тарткандыгын билдиришти.
Бул маселе маалымат жыйында көтөрүлүп, борбор калаадагы жер алдындагы өтмөктөрдүн тепкичтерине коюлган тайгалак плиталардын маселеси жакында жөнгө салынарын мэр Албек Ибраимов билдирген.
