БИШКЕК, 8-фев. — Sputnik. Кош бойлуу келин Бишкектеги Чүй жана Манас проспектилеринин кесилишинде жайгашкан жер алдындагы өтмөктөгү плиталарга тайгаланып кулаганын күбөлөр билдирди.
Алардын айтымына караганда, окуя кышкы мезгилде тайгалак болуп калган плиталардын кесепетинен болгон. Тез жардам кызматы келгиче күбөлөр келиндин жанында болушкан.
Келин болжол менен 25 жаштар чамасында. Ал өзүнө келгенде алты айлык боюнда бар экенин билдирген.
Бишкек шаардык Тез жардам кызматы аталган дарекке чакыруу болгонун ырастап, жабырлануучу Улуттук госпиталдын нейротравма бөлүмүнө жаткырылганын маалымдады.
Бишкектеги жер алдындагы өтмөктөрдүн полу буга чейин бетондон болчу, кийин ремонт учурунда плиталар төшөлгөн. Өткөн жылдын күз айларында ушул эле өтмөктүн чатырынан суу өтүп реконструкция жасаган компания кайра оңдоо иштерин мойнуна алган.
