БИШКЕК, 22-янв. — Sputnik. Афганистандын борбору Кабулда жайгашкан Intercontinental Hotel мейманканасына кол салган террорчулардан аман калган кыргызстандыктардын баары кыз-келиндер болгон. Бул тууралуу Тышкы иштер министрлигинин маалымат кызматынан билдиришти.
Эскерте кетсек, куралчан согушкерлер Intercontinental Hotel мейманканасына 20-январда түн ичинде кирип барышкан. Таң аткыча ал аймактан жардыруулар менен атышуулардын үнү жаңырып турган.
"Ал мейманканада жети кыргызстандык кыз-келин тейлөө жаатында иштечү. Алардын улуусу 46да, кичүүсү 23 жашта болгон. Учурда алар коопсуз жайда. Кыргызстандын Афганистандагы элчилиги алар менен жолугушту. Эч ким жаракат алган эмес. Бирок шок абалында. Документтери такталып бүтөөрү менен Кыргызстанга алып келинет", — деп айтылат маалыматта.
Intercontinental Hotel мейманкасына ушуну менен экинчи террордук чабуул жасалды. Алгач 2011-жылы да тогуз согушкер кол салып 12 адам каза тапкан. Натыйжада террорчулардын баары жок кылынган.
