Лапылдатып жааган кар айланага табияттын кооздугун жаратууда. Ушундай аба ырайында сүйгөн адамың менен бак аралай басып кар чачышып ойносоң кандай гана сонун ээ. Элестетип жатасыздарбы?.. Анткен менен бул тыйындын бир тарабы. Экинчи тарабы анча позитивдүү эмес.
Кардын жааганы шаардыктарга майрам тартуулаганы менен алыс жолго чыккандарга бир топ түйшүк жаратат. Мындай учурда айдоочулар жүргүнчүлөрү менен көздөгөн жерине жетпей ээн талаада суткалап жатып калышат. Андыктан сак болуңуздар, 16-январга чейин өлкөдө туруксуз аба ырайы күтүлөт. Бөөдө кырсыктарды болтурбоого аракет кылалы. Ар бир адамдын үйдө күтүп отурган ата-эне, бир тууган, бала-чакасы бар. Анткени ишемби күнү Бишкек — Ош жолундагы жол кырсыгынан төрт адам каза таап, үчөө жаракат алган. Жарадарлардын арасындагы жеткинчек кыз комага түшүп калган. Ал эми каза болгондор бир айылдын кулундары болушкан.
Түркиянын аэропортунда учак 162 жүргүнчүсү менен жарга кадалып калды. Кудай сактаптыр, эгер дагы 10 метр сүрүлүп барганда деңизге түшүп кетмек экен. Ажал оозунан кайткан жүргүнчүлөрдүн абалы кандай болду экен?..
Учак демекчи Кыргызстанга бүлүк салган Дача-Су айылындагы авиакырсыкка эртең бир жыл болот. Таңдагы каргашалуу кырсык 39 адамдын өмүрүн алып кеткен. Аталган айылдын башына каза болгондордун элесине арналган мемориалдык комплекс орнотулуп, ишемби күнү расмий ачылышы болду.
Коомчулукта чуу жараткан окуяларды ЖМКлар байма-бай жазганы менен айыпкерлер тиешелүү жазасын албай калган учурлар кездешет. Мындан улам соңку бир жылда чуулгандуу окуялардын айыпкерлери соттон кутулуп же жеңил жаза алып калды деп элдин сынына кабылган учурларын иликтедик.
Белгилүү публицист, коомдук ишмер, "Шоро" компаниясынын, "Супара", "Супара-Чуңкурчак" этно-комплекстеринин негиздөөчүсү, жаратман Табылды Эгембердиевдин көзү тирүү болгондо 67 жашка толмок. Ишкер тууралуу 12 факты менен таанышыңыз.
Ал эми белгилүү аткаруучу Чубак Сатаев жашоодон эрте кетпегенде 13-январь күнү, 58 жашка чыкмак. Уулун жоготкон, дипломаттап акча чачкан өнөр ээси тууралуу 9 факты.
Валюта наркы. Сомдун баасы долларга карата орто эсеп менен 69.26 (сатып алуу) жана 69.48 (сатуу) сомду түздү.
Мунай баасы. Бишкекте орточо эсеп менен алганда АИ-95 үлгүсүндөгүсү 43.80 сом, АИ-92 үлгүсүндөгүсү 40.90 сом, ал эми дизель майы 40.40 сомдон сатылууда.
Соңку сөз. Сактыкта кордук жок!
Амандыгыңызды тилеп Эламан Карымшаков.
