БИШКЕК, 19-дек. — Sputnik. Кыргызстанда жаңы салынган үйгө электр энергиясын туташтыруу үчүн энергетиктер 20 миң доллар пара талап кылышат. Мындай пикирин Саламаттыкты сактоо министрлигинин коомдук байкоочу кеңешинин мүчөсү Ноокат Идрисов билдирди.
Мамлекеттик органдардын алдындагы коомдук байкоочу кеңештин жылдык конференциясына катышкан Идрисов паракорчулук менен күрөшүү боюнча доклад жасады. Ал Кыргызстан Doing Business рейтингинде 75-орунда экенин белгилеп, ЕАЭБге кирген коңшу мамлекеттердин көрсөткүчү алда канча жакшы экенин айтты.
"Улуттук энергохолдингди алалы. Ал калкты электр энергиясы менен камсыз кылган 190 мамлекеттин компанияларынын ичинен 163-орунда турат. Өз продукциясын экспортко чыгаруу үчүн кымбат жабдууларды сатып алган, бирок аларга эмдигиче электр энергиясын туташтырбай келет. Экономика министрлигиндеги коррупцияны талкуулоо учурунда курулуш компаниялары жаңы үйгө электр киргизүү үчүн 20 миң доллардай пара берерин айтышкан", — деди Идрисов.
Ал ошондой эле коррупция боюнча рейтингде Кыргызстан 136-орунда турарын кошумчалады.
