БИШКЕК, 18-дек. — Sputnik. Орус-кыргыз региондор аралык конференциясында эки өлкөнүн ишкерлери тил табыша алды. Бул тууралуу Sputnik Кыргызстан агенттигинин кабарчысына РФтин экономикалык өнүгүү министрлигинин департамент башчысы Анна Попова билдирди.
Эске салсак, 15-декабрь күнү Бишкектеги "Ала-Арча" мамлекеттик резиденциясында орус-кыргыз региондор аралык конференциясы өткөн. Ага эки мамлекеттен 450дөн ашуун ишкер катышкан.
Попованын айтымында, иш-чаранын мындай ийгиликтүү болушуна эки тараптын тең кызыгуусу күчтүү экени себеп болду.
"Бул конференциядан улам Кыргызстан менен Россиянын ишкерлеринин ортосундагы мурдагы байланыштар бекемделип, жаңы келишимдер түзүлөт деп ишенем. Эмитен эле кызматташууга шарт түзгөн бир нече докуметке кол коюлду", — деди Попова.
Ошондой эле конференция маалында эки өлкөнүн экономикалык өсүшүнө түрткү бере турган долбоорлорго Россия тараптан финансылык булактар тартылышы керектиги айтылганын кошумчалады.
