БИШКЕК, 5-дек. — Sputnik. Грузиянын экс-президенти жана Украинанын Одесса облусунун мурунку губернатору Михаил Саакашвили Киевдин чок ортосундагы сегиз кабаттуу үйдүн чатырынан секирем деп коркутуп жаткан учуру интернетке жарыяланды. Ал видео Украинанын NewsOne телеканалынын YouTube баракчасына жүктөлгөн.
РИА Новости билдиргендей, бүгүн күч түзүмдөрү Саакашвилинин үйүндө тинтүү жүргүзгөн. Мындан улам ал сегиз кабаттуу үйдүн чатырына чыгып, ал жактан секирем деп коркуткан. Турак жайдын алдында атайын даярдыктагы аскерлер менен саясатчынын тарапташарынын кагылышуусу болгон. Кийинчерээк экс-президенттин чатырдан кармалганы белгилүү болду.
Саакашвили үч жылдан беш жылга чейин эркинен ажыратылышы мүмкүн. Грузия экс-президентин бир нече кылмыштар боюнча айыптап келет. Ал 2013-жылы ноябрда жаңы президент Георгий Маргвелашвили кызматка киришкенден кийин өлкөдөн чыгып кеткен.
