БИШКЕК, 11-сен. — Sputnik. Украинага мыйзамсыз киргендиги үчүн Грузиянын мурунку президенти, Одесса облусунун экс-губернатору Михаил Саакашвилиге кылмыш иши козголду. Бул тууралуу РИА Новости Улуттук полицияга шилтеме берүү менен жазып чыкты.
Украина жарандыгынан ажыраган Саакашвили жекшемби күнү тарапташтарынын колдоосу менен "Шегини" өткөрүү пункту аркылуу өлкөгө кирген. Чек ара кызматынын жетекчисинин орун басары Олег Слободян Саакашвилинин мыйзамсыз өткөнүн билдирди.
"Бүгүн, 11-сентябрда Львовщина полициясы "Шегини" өткөрүү пунктунан мыйзамсыз өткөндөр тууралуу иликтөөсүн сотко чейинки тергөөлөрдүн бирдиктүү реестрине киргизди. Бул кадамы үчүн мыйзам бузгандар беш жылга эркинен ажыратылып, транспорттук каражаты конфискацияланат", — деп жазылат маалыматта.
Саакашвили 2013-жылы ноябрь айында жаңы президент шайланганда Грузиядан кеткен. Өлкө прокуратурасы экс-президентке сыртынан бир нече берене боюнча айып таккан.
2015-жылы Порошенко ага Украинанын жарандыгын берип, Одесса облусунун губернатору кылып шайлаган. Бир жылдан кийин Саакашвили украин бийлиги коррупцияга каршы турууга каалоосу жок экенин айтып, ээлеген кызматын таштаган.
