БАТКЕН, 4-дек. — Sputnik. Кадамжай районундагы Орозбеков айыл өкмөтүнүн Учкун айылында кичи автобус жол кырсыгына кабылып, оодарылып кеткен. Бул маалыматты облустук милициядан тастыкташты.
Маалыматка ылайык, окуя бүгүн, 4-декабрда, эртең мененки саат 8:30дар чамасында катталган. Sprinter үлгүсүндөгү унаа Кадамжайдын Айдаркен шаарчасынан Ошту көздөй бараткан.
"Кырсыкка кабылган учурда унаада 14 жүргүнчү болгон. Аларды куткарууга ӨКМдин мобилдиштирилген тоо кен кырсыктарынан куткаруу взводунан 1 техника, 4 куткаруучу барган. Кырсыктын кесепетинен алган жараатынан улам үч адам жергиликтүү ооруканага жеткирилди. Калган жүргүнчүлөрдүн абалы жакшы", — деп айтылат маалыматта.
Кайгуул милициясы тарабынан кырсыктын кесепети иликтенип жатат.
