БИШКЕК, 24-ноя. — Sputnik. Президент Сооронбай Жээнбеков аппарат жетекчилиги менен кеңешме өткөргөнүн өлкө башчынын маалымат кызматы билдирди.
Кеңешмеде Жээнбеков аппараттын алдында ишке тез ашырылчу кыска мөөнөттүү иш планын жана биринчи кезектеги максаттарды белгиледи.
Жээнбеков экс-президент Алмазбек Атамбаевдин төрагалыгы алдында 2017-жылдын 15-ноябрында өткөрүлгөн Кыргызстанды туруктуу өнүктүрүү боюнча Улуттук кеңештин жыйынында негиз катары кабыл алынган өлкөнү туруктуу өнүктүрүү стратегиясын 2018-жылдын 15-февралына чейин иштеп чыгып, бүтүрүү керектигин эскертти. Ал белгилегендей, 2018-2040-жылдарга карата туруктуу өнүктүрүүнүн улуттук стратегиясы келе жаткан жылдын февраль айынын аягында кабыл алынышы керек.
Мындан тышкары, президент жакын арада коррупцияга каршы күрөшүүнүн негизги багыттарын белгилеген Коопсуздук кеңешинин отурумун өткөрүү тапшырмасын берди.
