Суук түшүп келе жатканда бул акчалар карапайым калктын чөнтөгүнө туура келеби, кара алтынга болгон баа качан көзөмөлдөнө баштайт? Бул суроолорго жооп алуу максатында Sputnik Кыргызстан агенттиги тийиштүү мамлекеттик органдарга кайрылып көрдү.
Монополияга каршы жөнгө салуу мамлекеттик агенттигинин билдирүүсүнө ылайык, учурда мекеме өлкө аймагындагы көмүр баасын жөнгө сала турган токтомдун үстүндө иштеп жатат. 30-ноябрдан тартып анык бир баа белгиленип, аймактар көзөмөлгө алына баштайт.
"Азырынча дүңүнөн жана чекене сатыла турган баалар өз-өзүнчө эсептелүүдө. Дүңүнөн саткандарга көмүрдүн өз баасына беш пайыз, ал эми алып сатуучуларга 10 пайыз кошуп сата тургандай кылып бааларды эсептеп беребиз", — деди аталган агенттиктин маалымат катчысы Азамат Муканов.
"Кыргыз көмүр" ишканасы учурда көмүрдүн баасы акырындап нугуна түшүп келе жатканын айтып, өлкөдө кара алтын былтыркыга салыштырмалуу кенен экенине токтолду.
Ишкана Бишкекте көмүр баасынын көтөрүлүп кеткенине ортодо Казакстандан кара алтындын келбей калышы себеп экенин белгиледи. Ушу тапта көмүр жеткирүү жанданып, баа да өз калыбына келе баштаган.
Эске салсак, 16-ноябрда өкмөт башчы Сапар Исаков, өлкө аймагында сатылуучү көмүрдүн баасын мамлекеттик жөнгө салууну киргизүү жөнүндө токтомго кол койгон. Маалымат боюнча атайын токтомдун негизинде 90 күн ичинде көмүрдүн баасы көзөмөлдөнүп турат. Эгер алып сатуучулар коюлган баага баш ийбесе аларга административдик айып пул салынат.
