Өспүрүмдүн айтымында, класс жетекчиси менен мектеп директору аны аз камсыз үй-бүлөдөн экенин айтуу менен төлөмдөрдү төлөбөй жатканын окуучулардын көзүнчө айтып басынткан.
Бирок ал ошол күнү үйүнө түнөгөн эмес. Эртеси анын туугандары ызы-чууга түшүп, милицияга арыз жазышкан. Өспүрүм издөөгө алынып, үч күн дегенде табылды.
Натыйжада Шамшарбекти анын достору үйүнөн алыс эмес жердеги каралбай калган имараттын аймагынан таап, үйүнө алып келишкен. Учурда өспүрүмдүн апасы Зарылбүбү Алымбекова №32 мектептин директору Асел Садыкова менен Шамшарбектин класс жетекчисин жоопко тартууну өтүнүп жатат. Анын айтымында, баланын жоголуп кетишине алардын басынтуусу себеп болгон.
Өспүрүмдүн апасы баласын өзү жалгыз чоңойтконун, каржылык кыйынчылыктардан улам үй-бүлө турак жайынан ажырап, нымдуу жатаканада эптеп күн көрүп келерин белгилеп өттү. Байма-бай ооруган Алымбекова үйдөн тигип оокат кыларын, саламаттыгына байланыштуу майыптыгы боюнча пенсияга чыгууга документтерди камдап жатканын айтты. Мектепке ал ай сайын 1300 сомдон ашуун акча төлөөгө аргасыз. Бул каражаттын 300 сому — мугалимдердин кошумча айылыгына, 350 сому — мектептин кароолчуларына, 250 сом — пол жуугучка, 350 сом — класстын куржунуна жана 80-100 сом театр жана башкаларга жумшалат.
Садыкова Шамшарбектин класс жетекчиси 31-октябрь күнү өзү өмүрүнө кол салууга аракет кылганын, медициналык жардам алгандан кийин абалы турукташканын айтып берди.
