Кызматта талаш-тартыш, пикир келишпестик, же болбосо өтө эле жакындык сыяктуу ар түрдүү кырдаал түзүлүшү толук ыктымал. Бирок ар нерсенин чеги жана орду болот. Sputnik Кыргызстан агенттиги тамаша иретинде кесиптештер ортосундагы жасабай, болбой турган нерселерди тизмектеп көрдү.
Өтө ынак болуп кетпейт. Кесиптеш менен сөзсүз жакшы мамиледе жүрүү керек. Бирок өтө эле ысык, сырдаш, курдаш, дос болуп кетүүдөн этият болгон оң.
Көңүл калтырышпайт. "Адамдын көңүлү гүл" деп коет эмеспи, бул кесиптешке да тиешелүү. Жумушта иштин кызыкчылыгы үчүн ар кыл пикирлер айтылып, талаш-тартыш болот деңизчи. Ошондой учурда жаман сөз менен кесиптештин көңүлүн калтырып алгандан абайлаңыз.
Көпчүлүктүн алдында кемсинтпейт, тескебейт. Ар бир адамдын кемчилиги менен кошо эле артыкчылыгы бар. Көпчүлүктүн көзүнчө басынтып сүйлөө, тескөө адамдын шагын сындырып коет эмеспи. Ошончолук эле чыдабай баратсаңыз, өзүнчө бир жерге барып мамилени чечишип алган дурус.
Айлык акысын сурабайт. Кесиптештер бири-биринен айлык маянасын сурашкан туура эмес. Биринчиден, бул этикага жатпаса, экинчиден, бирөөнүн айлыгын эмне кыласыз.
Сүйүү мамиле куруудан этият бол. Бул тыюу негизинен үй-бүлөлүү адамдарга тиешелүү. Колдон келишинче кесиптештер менен сый мамилени сактап калууга аракет кылыңыз.
