БИШКЕК, 27-окт. — Sputnik. Экономика министри Артем Новиков кыргыз-казак чек арасындагы абалдан улам жапа чеккен атамекендик ишкерлерге колдоо көрсөтүү механизми иштелип чыгарын маалымат жыйында билдирди.
Анын айтымында, ишкерлер ассоциациясы менен сүйлөшүүлөр жүргөн. Андан сырткары, жүктөрдүн ээлери тарткан чыгымдар боюнча толук маалымат даярдалып жатат.
Новиков ошондой эле келтирилген чыгымдар боюнча колдоо болоорун айтты. Мисалы насыялардын мөөнөтү узартылышы мүмкүн. Андан кийин ишкерлерди колдоо боюнча механизм сунушталат.
Чек арадагы тоскоолдуктар 10-октябрда жаралган. Астананын маалыматына караганда, бул карантиндик продукциялардын импорттолушуна бөгөт коюу үчүн жасалып жатат. 18-октябрь күнү премьер-министр Сапар Исаков Казакстанга барып жүргүнчүлөр автобустарын, жеңил автокөлүк менен жүк ташуучу унааларды кое берүү боюнча макулдашкан.
Ереван шаарында өткөн ЕАЭБге мүчө мамлекеттин өкмөт башчыларынын жыйынында Казакстандын премьер-министри Бакытжан Сагинтаев кыргыз тарапты чек арадагы бажы көзөмөлүн назар жөнгө салып жатат деп айыптаган. Кыргызстандын Экономика министри Артем Новиков журналисттерге өлкө бийлиги жооп кайтарарын айтып, казак премьеринин айткандары түзүлгөн кырдаалды чечүүгө эч кандай салым кошо албай турганын билдирген.
