БИШКЕК, 25-окт. — Sputnik. Интернетте хит болгон "Зың-зың" ырынын автору Болат Нуримов каза тапканын Sputnik Казакстан жазып чыкты.
Агенттиктин өздүк булагынын айтымында, учурда Болаттын жакындары менен достору акыркы сапарга узатуу зыйнатын уюштуруу менен алек. Өнөрпоздун каза болгонун ырчы Серик Ибрагимов дагы ырастады.
"Бул сүрөттө менин иним жана досум Болат! Эми ал биздин арабызда жок. Ал абдан жөнөкөй жакшы адам эле. Келгиле, дуба кылалы", — деп өзүнүн Instagram баракчасына жазган.
"Зың-зың" ыры социалдык тармакка чыгар замат вирустук видеого айланган. Популярдуулуктун туу чокусун Jokeasses вайнерлеринин клиби алып келген.
Юмористтердин YouTube каналындагы композициясын миллиондон ашык адам көргөн. Ушул эле клип Instagram тармагынан жарым миллион жолу көрүлгөн. Буга чейин Нуримов бул композицияны аткарып, бирок өчүрүп салса дагы интернетке тарап кетип, популярдуулукка ээ болгонун билдирген.
