Борбор калаадагы тарых музейинде 1960-жылдан бери турган мумия жакында Маданият министрлигинин чечими менен Баткен облусунун Кара-Булак айылындагы Мактым-Гөр деген жерге көмүлдү.
Тарыхый экспонат делген бул артефактынын жерге берилиши коомчулукта бир топ ызы-чуу жаратып, айрымдары анын жерге берилишин туура деп эсептесе, тарыхчы, археологдор мумияны кайра казып алуу талабын коюшууда.
Дал ушул мумия тууралуу коомчулукта ар түрдүү имиштер айтылып жүрөт. Алардын айрымдарын Sputnik Кыргызстан маалымат агенттигине музейдин кароолчулары жана кызматкерлер баяндап берди.
Келме келтирген кароолчу, ары-бери чуркаган кыз
"Биз бешинчи кабаттан түшүп келе жаткан тепкичтин түбүндө отурчубуз. Ал эми мумия үстүңкү кабатта айнекте сакталчу. Мен анын элесин бир-эки эле жолу чала көрдүм. Жаш кыз кудум кинодогудай шуулдап тепкичтен түшүп, кайра үстүнө көтөрүлүп кетчү. Башында корктум, бирок келме келтирип, белгисиз кыздын атына деп куран окуп койчумун. Кийинчерээк коркпой деле калдык, зыяны жок болчу", — деди кароолчу.
Нурбек мырза музейде учурда деле иштейт, бирок азыр ал жакта толугу менен ремонт иштери жүрүп жаткандыктан эч нерсе байкабай калганын кошумчалады.
Арча жыттанган мумия, жумушун которгон "Анархан"
"Биздин милдет — тарыхый экспонаттарды тазалап, жакшы кароо. Күндө келип аларды бир сыйра тазалайбыз. Анын ичинде мумия жаткан айнекти да сүртүп турчубуз. Мен айнекти сүртүп жатканда таптакыр аны карабаганга аракет кылчумун, айрыкча көз жагын. Кесиптештер да тазалап жатканда "башын көтөрүп мени карап тургандай сезиле берет" деп бат-баттан тазалашчу. Кызыгы, биз эртең менен келсек дайыма ошол мумия жаткан жак арча жыттанып калчу. Кечки нөөмөткө тургандардан "арча түтөттүңөрбү" деп сурасак, "жок" дешчү". Таң калчубуз", — деди Венера айым.
Ал ошондой эле мумия жаш кыз болгонун, өзү көрбөгөн менен кечки нөөмөткө тургандар дайыма айтып жүргөнүн эстеди.
Кыздын элесин көрүүгө ашыккан күзөтчү
Тарых музейин кайтарган ИИМдин алдындагы күзөт кызматчыларынын бири Алмаз мумия жаш, сулуу кыз дегенинен аны дайыма көргүм келчү дейт.
"Бул жактагы байкелер "чачы узун, жашы 18дердеги кыз дайыма узун ак көйнөк кийип алып ортодогу тепкичтен түшөт" деп айтып калышчу. Кечкисин карап күтчүмүн, бирок менин көзүмө көрүнгөн жок", — деди Алмаз.
Учурда мамлекеттик тарых музейи толук бойдон реконструкцияланып жатат. Жетекчиликтин айтымында, ушул жылдын аягына чейин оңдоп-түзөө иштери бүтүп калат.
