БИШКЕК, 18-окт. — Sputnik. ИИМдин баңгизатын мыйзамсыз сатууга каршы күрөшүү кызматы атайын операциянын жыйынтыгында "Спайс" саткандардын тобун кармады. Бул тууралуу Ички иштер министрлигинин маалымат кызматы билдирди.
Ага ылайык, аталган кызмат көп убакыттан бери "Спайс" даярдап, аны интернет аркылуу сатуу менен шугулданган топтун изине түшкөн. Топ Россиянын, Өзбекстандын жана Кыргызстандын тургундарынан турган.
Аткарылган иштердин жыйынтыгында аталган топтун чиеленишкен аракеттеринин бети ачылып, электрондук акчаны кантип колго алганы аныкталган.
"Электрондук акча Бишкекти жайгашкан "Мобильник" ЖЧКсынын эсебинен Казакстандагы Natipay фирмасына, андан соң Qiwi ишканасынын Армениядагы өкүлчүлүгүнө, кайта Qiwi ишканасынын Москвадагы банкынын эсебине которулган. Түшкөн каражат Visa картасына которулуп, ал Кыргызстандан, Казакстандан жана Россиядан алынып турган", — деп айтылат маалыматта.
Алар Россиянын 26 жаштагы жараны жана анын 23 жаштагы аялы экени аныкталган.
Ошондой эле даярдалган спайсты кардарларга жеткирүү үчүн аларды тийиштүү жерлерге каткан Кыргызстандын 41 жана Өзбекстандын 27 жаштагы жарандары кармалган.
Аталган факты боюнча кылмыш иши козголду.
