Сөөк кордолбошу керек экендигин Маданият, маалымат жана туризм министри Түгөлбай Казаков журналисттердин суроолоруна жооп берип жатып билдирди.
Эске салсак, 14-октябрда Баткен облусунун Кара-Булак айылындагы Мыктым-Гөр деген жерге IV-V кылымдарга таандык делген мумия жерге берилген. Ал 1960-жылдан бери борбордук тарых музейинде сакталып келген.
"Мумия ведомстволор аралык комиссиясынын чечими менен көмүлдү. Анын мүчөлөрү менин сөзүмө дароо макул болуп уккудай жаш бала эмес да. Алар мага баш ийбейт. Бизге атайын адамдар кайрылып же изилдөө керек экендигин, же көмүү зарылдыгын айтышты. Кордоп тургузуп коюу туура эмес дешти. Сөөк кордолбошу керек", — деди министр.
Ал ошондой эле буга чейин мумияны изилдөөгө Илимдер академиясына көп жолу сунуш болгонун, бирок алар баш тартып келгенин кошумчалады.
