БИШКЕК, 17-окт. — Sputnik. Өлкө башчы Алмазбек Атамбаев Мамлекеттик чек ара кызматынын төрагасы Уларбек Шаршеевди кабыл алды. Бул тууралуу маалымат президенттин сайтына жарыяланды.
Билдирмеге караганда, Шаршеев мамлекет башчыга кыргыз-казак чек арасындагы кырдаал боюнча маалымат берген.
"Казакстан тараптын бир жактуу чараларынан улам кошуна өлкөнүн көзөмөл өткөрүү бекетинде жарандар менен транспорттор кезекте турат", — деп Шаршеев билдирген.
"Мамлекет башчы тез бузулуучу азыктар жүктөлгөн жүк ташуучу унааларды Казакстандын өткөрүү пункттарына биринчи кезекте багыттоого көмөктөшүүнү тапшырды", — деп айтылат маалыматта.
Эске салсак, 10-октябрда, кечинде кыргыз-казак чек арасындагы үч көзөмөл өткөрүү бекетинде кезек күткөн адамдардын жана унаалардын саны өсүп, жөнөкөй элди бушайманга салган. Бир күн өткөн соң Казакстандын улуттук коопсуздук боюнча комитети өлкөнүн бардык чек араларында атайын операция жүргөндүктөн жогорудагыдай кырдаал түзүлгөнүн маалымдаган.
