БИШКЕК, 15-окт. — Sputnik. Борбордук шайлоо комиссиясынын төрайымы Нуржан Шайлдабекова талапкерлердин биринин да паспорту Боршайкомдун сайтына жарыяланбаганын атайын маалымат жыйында билдирди.
Белгилей кетсек, Борбордук шайлоо комиссиясынын расмий сайтына айрым талапкерлердин паспортторунун көчүрмөсү жарыяланган болчу. Бирок бир нече убакыттан кийин алар алынган.
Шайлдабекова журналисттердин суроолоруна жооп берип жатып, бир да талапкердин паспорту сайтка жарыяланбаганын айтты.
"Боршайкомдун сайтына талапкерлердин паспортторунун көчүрмөсү жарыяланган эмес. Ал жакта талапкерлердин программасы тууралуу маалыматтар бар. Сиздер балким башка сайттардан көргөндүрсүздөр. Эгер биздин сайтка чыккан болсо аны тастыктаган сүрөт же скриншотту берсеңиздер ага чара көрөбүз. Себеби жеке маалыматтарды кандай гана сайт болбосун жарыялоого болбойт", — деди ал.
Бүгүн Кыргызстанда президенттик шайлоо өтүп жатат.
Учурда өлкө боюнча 2 375 шайлоо участкалары ачылды. Анын 234ү Бишкекте, 37си чет жакта жайгашкан.
Өлкө аймагында президенттик шайлоо кандай өтүп жатканын Sputnik Кыргызстан агенттигинин тексттик трансляциясынан окуңуздар>>
