БИШКЕК, 10-окт. — Sputnik. "Ата Мекен" партиясынын лидери Өмүрбек Текебаев менен мурунку элчи Дүйшөнкул Чотонов УКМКнын тергөө абагынан №1 СИЗОго которулганын Sputnik Кыргызстан агенттигине күч түзүмдөрүндөгү булак билдирди.
Жаза аткаруу мамелкеттик кызматы бул маалыматты тастыктады.
"Камактагылар бүгүн болжол менен саат 12.30дарда которулушту. Кийинки жумада колонияларга бөлүштүрүлүшү мүмкүн", — деп айтышты маалымат кызматынан.
Эскерте кетсек, шаардын Биринчи Май райондук соту Өмүрбек Текебаев менен Дүйшөнкул Чотоновду күнөөлүү деп таап, сегиз жылдан эркинен ажыраткан. 2-октябрда шаардык сот аталган чечимди күчүндө калтырган.
"Ата Мекендин" лидери россиялык ишкер Леонид Маевскийден "Альфа Телеком" (Megacom) компаниясын анын пайдасына чечип берүү үчүн 1 миллион доллар пара алган деп айыпталган.
