БИШКЕК, 10-окт. — Sputnik. "Кыргызстан — кыска метраждуу тасмалардын өлкөсү" эл аралык кино фестивалына арыздарды кабыл алуу 1-ноябрга чейин уланат. Бул тууралуу уюштуруучулар билдирди.
Аталган фестиваль 12-15-декабрда Бишкек шаарындагы "Манас" кинотеатрында өтөт.
"Фестивалга 30 мүнөттөн ашпаган документалдык, анимациялык тасмалар катыша алат. Учурда жалпысынан 200 тасма келип түштү", — деп айтылат маалыматта.
Уюштуруучулардын айтымында, конкурс эки программадан — эл аралык жана улуттук деп бөлүнөт. Ар бир программа боюнча 15тен тасма тандалып алынат. Фестивалдын алкагында мастер-класстар, атайын көрсөтүүлөр өтөт.
Фестивалдын жыйынтыгында "Мыкты тасма", "Мыкты режиссура", "Калыстардын атайын призи" сыяктуу жана башка номинациялар боюнча жеңүүчүлөр аныкталат. Байге фондусу — 500 миң сом.
Иш-чара "Айтыш" коомдук фондусу, Кинематография департаменти жана Кыргызстандын кинематографисттер союзу тарабынан уюштурулууда.
