ОШ, 8-окт. — Sputnik. Ош облусунун аймагында катталган жол кырсыктарынын кесепетинен 80 адам каза болгон. Бул тууралуу облустук кайгуул милициясынын башчысынын орун басары Мадамбек Кубатов Sputnik Кыргызстан агенттигине билдирди.
Анын айтымында, жыл башынан бүгүнкү күнгө чейин облус аймагында жалпы 530 жол кырсыгы катталып, 847 адам ар түрдүү жаракаттар менен ооруканага түшкөн.
"Жол кырсыктарын болтурбоо, алдын алуу максатында учурда "Маяк" аталышындагы рейд өткөрүлүп жатат. Анда "Тез жардам" кызматынын унаасына жол бошотпой, маякка жооп бербеген айдоочуларга чара көрүлүүдө. Алгач эскертүүлөрдү бердик. Жол эрежесин одоно бузуп, "Тез жардам" кызматынын унаасын өткөрбөй, ага тоскоолдук жараткан айдоочуларга Административдик кодекстин 241-беренесинин негизинде 500 сомдон 1000 сомго чейин айып пул салынды", — деди Кубатов.
Ал кошумчалагандай, аталган рейд Ички иштер министрлигинин буйругунун негизинде өлкөнүн бардык облустарында өткөрүлүп жатат.
