БИШКЕК, 26-сен. — Sputnik. Президент Алмазбек Атамбаев Ички иштер министрлигинин кызматкерлери үчүн Токмок шаарында курулган көп батирлүү турак жайдын ачылыш салтанатына катышып, жаңы үй ээлерине ачкыч тапшырды. Бул тууралуу өлкө башчынын маалымат кызматы билдирди.
Атамбаев жаңы конуштуу болгон орган кызматкерлерин куттуктап, акыркы жети жыл ичинде күч структурасына, милицияга болгон мамиле өзгөргөнүн белгиледи.
"Өлкөдө аскер кызматкерлери, чек арачылар, куткаруучулар үчүн турак жайлар салынып жатат. Акыркы жылдар аралыгында айлык акы көбөйүп, тиешелүү шарттар менен камсыздоо үчүн аракеттер жумшалып жатат", — деди президент.
Сөзүнүн аягында өлкө башчы балдар аянтчасын куруу үчүн сертификат тапшырды.
Эскерте кетсек, акыркы эки жылдын аралыгында аскер кызматкерлери менен милиционерлер үчүн 1852 батирлүү 52 үй курулган. Ушу тапта дагы 1741 батири бар 40 объект салынып жатат.
