БИШКЕК, 22-сен. — Sputnik. Президент Алмазбек Атамбаев 21-сентябрда Нью-Йоркко болгон иш сапарынын алкагында General Electric компаниясынын вице-президенти, КМШ боюнча компаниянын президенти жана башкы аткаруучу директору Рон Поллетт менен жолугушту. Бул тууралуу өлкө башчынын маалымат кызматы билдирди.
"Жолугушуунун жүрүшүндө General Electric компаниясынын Кыргызстандагы ишмердигине, анын ичинде энергетикалык инфраструктураны модернизациялоо тармагына тиешелүү маселелер талкууланды", — деп айтылат маалыматта.
Белгилей кетсек, Кыргыз өкмөтү 2017-жылдын 10-июлунда Чехиянын Liglass Trading CZ, SRO компаниясы менен Жогорку Нарын каскадына жана чакан ГЭСтерди куруу боюнча келишим түзгөн. Инвестор өз ыктыяры менен Кыргызстандын "Русгидро" ишканасына болгон 37 миллион карызын төлөп берүү милдетин алган. Бирок чех компаниясы белгиленген мөөнөттө аталган сумманы төлөй албай, аны төлөө мөөнөтүн узартууну суранган. Бирок КР өкмөтү бир тараптуу негизде компания менен түзүлгөн келишимди жокко чыгаруу чечимин кабыл алган.
