БИШКЕК, 18-сен. — Sputnik. Премьер-министр Сапар Исаков Чехиянын Liglass Trading CZ, SRO компаниясы менен болгон Жогорку Нарын каскадын жана чакан ГЭСтерди куруу боюнча келишимди бир тараптуу жокко чыгаруу тапшырмасын берди.
Белгилей кетсек, бүгүн, 18-сентябрь күнү Liglass Trading CZ, SRO чех компаниясы кыргыз өкмөтүнө Жогорку Нарын каскады үчүн 37 миллион долларды төлөө мөөнөтүн узартып берүү суранычы менен кайрылган. Аталган каражатты которуу мөөнөтү 19-сентябрь болчу.
"Каражатты которуу мөөнөтүн узартууну өтүнүштү. Бирок мындай нерсе мыйзамдарга жана түзүлгөн келишимге туура келбейт. Ошондуктан келишимди бир тараптуу жокко чыгаруу сунушу түштү", — деди вице-премьер Дүйшөнбек Зилалиев.
Кыргыз өкмөтү 2017-жылдын 10-июлунда Чехиянын Liglass Trading CZ, SRO компаниясы менен Жогорку Нарын каскадына жана чакан ГЭСтерди куруу боюнча келишим түзгөн. Инвестор өз ыктыяры менен Кыргызстандын "Русгидро" ишканасына болгон 37 миллион карызын төлөп берүү милдетин алган.
