БИШКЕК, 20-сен. — Sputnik. Премьер-министр Сапар Исаков 19-сентябрда Нарындын объектилерин кыдырып, бир катар тапшырмаларды берип, андан сырткары, жай жарандардын жашоосу менен таанышты. Бул туурасында өкмөттүн маалымат кызматынан кабарлашты.
Исаков Нарын облусуна болгон жумуш сапарынын алкагында Нарын аймактык ветеринардык дартты аныктоо жана экспертиза борборун ишке киргизүүнү тездетүү тапшырмасын берди. Ал курулуш жана капиталдык оңдоо иштерин көрүп, калган жумуштарды аягына чыгарууга өкмөт 4,5 миллион сом каражат бөлгөнүн айтты.
"Нарын облусунун фермерлерине ЕАЭБдин алкагында 180 миллиондук рынокко чыгып, эт жана сүт азыктарын экпорттоого жакшы мүмкүнчүлүктөр түзүлөт. Буга байланыштуу оңдоо жана керектүү жабдууларды сатып алуу иштерин тездетүү зарыл", — деди премьер-министр.
Андын сырткары, Ат-Башы районундагы индустриялык соода-логистикалык борбору курулуучу аймакка барды. Ал курулуш иштери боюнча планды иштеп чыгууга Экономика министрлигинин алдындагы Инвестицияларды алдыга жылдыруу агенттигине бир жума убакыт берди.
Премьер сатуучулар менен сүйлөшүп, алардын суроолоруна жооп берди. Ал жерден Нарын шаарындагы аз камсыз болгон жана Баатыр эне Эркингүл Казиеванын үй-бүлөсү үчүн азык-түлүк сатып алып, анын үйүнө барып, жашоо шарты менен таанышты.
Казиева эч жерде иштебейт, үй-бүлөсү 2000-жылдан бери Нарын шаардык социалдык өнүктүрүү башкармалыгынын көзөмөлүндө турат.
