БИШКЕК, 15-сен. — Sputnik. Бишкек шаардык травматология жана ортопедия илим изилдөө борборунда заманбап кабылдама ачылганын мэриядан билдиришти.
Борбордун ачылыш аземи бүгүн, 15-сентябрда, болду. Ага калаа мэри Албек Ибраимов, вице-мэр Айгүл Рыскулова жана медицина илимдеринин доктору Сабырбек Жумабеков катышты.
"Жаңыланган заманбап борбор дарыгерлердин ишин кыйла жеңилдетет. Ошондой эле медициналык жардамга муктаж бейтаптарга жакшы шарттар түзүлгөн. Мындан башка операция жасоого ылайыкталган эки кошумча зал жана Тез жардам кызматы үчүн ыңгайлуу унаа токтотуучу жай каралган", — деп айтылат маалыматта.
Кабылдама борборун куруу иштери үстүбүздөгү жылдын апрель айында башталган. Анда күтүү залы жана бейтаптын абалын компьютер аркылуу каттоо каралган.
